Laacibka khadka dhexe ee Jordan Henderson ayaa taageereyaasha Liverpool ku sagootiyay muuqaal lasoo dhigay baraha bulshada Arbacadii, isagoo xaqiijiyay inuu ka tagayo kooxda kadib 12 sano, isaga oo u dhaqaaqay kooxda Saudi Arabia ee Al-Ettifaq.
Kabtankii hore ee Liverpool ayaa ku biiri doona Saudi Pro League kadib markii Al-Ettifaq ay bixisay lacag lagu qiyaasay 13 milyan oo gini oo u dhiganta 16.77 milyan oo gini, sida ay wararku sheegayaan.
“Way adagtahay in 12-kii sano ee lasoo dhaafay erayo lagu sheego, xitaa way adag tahay in la macsalaameeyo,” ayuu 33-jirkan ku soo qoray bartiisa Instagram-ka.
Henderson waxa uu Anfield kaga yimid kooxda Sunderland sannadkii 2011, tan iyo markaas waxa uu u saftay 492 kulan isagoo u dhaliyay 33 gool iyo 61 caawin dhammaan tartamada kooxda.
Ciyaaryahanka heerka caalami ee dalka England ayaa ka caawiyay kooxda Juergen Klopp inay ku guuleysato horyaalkoodii ugu horeysay ee Premier League muddo 30 sano ah sannadkii 2020. Wuxuu sidoo kale kabtan u noqday Liverpool guulihii ay ka gaartay koobabka FA Cup, League Cup, UEFA Super Cup iyo koobabka Club World Cup.
Henderson waxa uu Al-Ettifaq kula midoobi doonaa saaxiibkiisii hore ee Liverpool Steven Gerrard, kaasoo loo magacaabay xilka tababarenimo, isaga oo u saxiixay qandaraas saddex sano ah horraantii bishan.