Wasiirka Madaxtooyaddda Somaliland oo Ka Warbixiyey Safar Isaga iyo Xubno Guddida Gurmadka Abaaruhu Ugu Baxayaan Kuwait

Hargeysa – (warsoor) – Wasiirka Madaxtooyadda Somaliland Md. Maxamud Xaashi ayaa maanta ka warbixiyey safar uu ugu kicitamayo dalka Kuwait isaga iyo xubno ka mid ah guddida gurmadka Abaaraha ee heer qaran.

Wasiirka Madaxtooyadda ayaa sidoo kalena shaaciyey wufuud kale oo ay u kala dirayaan wadama dariska si buu yidhi ay ugala hadlaan xaalada abaaraha ba’an ee dalka ka jira iyo caawimada aynu qaran ahaan ugu baahan nahay, mudane Xaashi ayaa sidaasi u sheegay qaar ka tirsan Saxaafadda dalka oo uu galabta kula hadlay Madaarka Cigaal oo uu ka dhoofayey waxaanu yidhi “ Galabta waxaan u ambabaxay waddanka Kuwait, waxa saaka halkan ka dhoofay xubno kale oo guddida abaaraha iyo xukuumadda ka tirsan, oo wasiirka qorshaynta qaranka, wasiirka caafimaadka, gudoomiyaha hay’adda sekada iyo mudane Sakariye oo guddida abaaraha ka tirsan, aniguna weftigaa ayaa ka mid ahaa galabta ayaan aniguna ka daba-tagayaa idamka ILAHAY, waxaanu u kicitimaynaa waddanka Kuwait, waxaanu la kulmaynaa dawladda Kuwait iyo hay’adaha khayriga ah ee waddankaasi.”

Mudane Maxamuud Xaashi ayaa waxa uu intaasi ku daray “Ujeedada socdaalkayagu waxa ay tahay in aanu taakulayn ugu doono dadka tabaalaysan ee ummadda Somaliland ee abaaruhu saameynta weyn ku reebeen, Xukuumaddu waxa ay wadaa dadaalo badan oo ay taakulayn ugu raadinayso dadkaas, hadii ay tahay mid aynu inagu isku tashanayno Xukuumad ahaan wixii aanu bixin karno, wixii shacbiga Somaliland qaadhaan aanu ka guri karno iyo wixii dalalka aynu saaxiibada nahay aynu ka baahaysan karno.”

Wasiirka Madaxtooyadda ayaa geesta kalena ka hadlay wufuud ay Xukuumaddu u kala dirayso wadamada jaarka waxaanu yidhi “ Waxa dhawaan ilaa Isniinta bixi doona wefti weyn oo u bixi doona wadamada Jabuuti, Kiiniya, Yugaandha iyo Tansaaniya wadamadaas oo dhan u bixi doona, waxa wadanka Itoobiya ku maqan wasiirkii khaarajiga iyo xubno kale oo iyaguna la socda oo shirka midowga afrika ka wada hawlo dublamaasiyadeed, waxa uu maanta wasiirku la kulmay wasiirka khaarajiga Itoobiya wuxuu u bandhigay xaaladda abaarta, kaalmo ayeynu dawladda itoobiya waydiisanay, waxa ay inoogu yabooheen ilaa sadex kun oo tan oo qamadi iyo wixii la mid ah, waxa kale oo ay inoogu yabooheen calaf wixii ay ina siin karaan inay ina siiyaan, dadaaladaas oo dhami waxay ay ka turjumayaan walaaca xaalada abaareed ee bulshada Somaliland haysata waxaanu bulshadda ugu baaqaynayaa inay isu naxariistaan isna kaalmeeyaan.”

Halkan ka daawo  shirka jaraa’id ee Wasiirka Madaxtooyadda:

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.